政情：泰偏頗向內地遊客開火
大律師公會前主席石永泰「爆seed」早有前科，今年初佢曾經大鬧有啲香港人，為咗利益就卑躬屈膝、委曲求全、跪地求饒，尋日佢又再發炮喇！但今次就將矛頭轉向啲不文明同財大氣粗嘅內地遊客。石永泰直指有啲內地人說話狂妄，恃住自己有錢就「一朝得志，語無倫次」，之後又講到有啲內地高官及學者，經常發表一啲家長式及同港人生活方式格格不入嘅言論。唔知佢所講嘅「語無倫次」，淨係指啲野蠻旅客，定係包括埋嗰啲高官學者呢？
「一朝得志 語無倫次」
石永泰尋日喺電台節目上，大談香港同內地嘅價值分歧，當中提到內地遊客喺國外嘅不文明舉止。佢話發現有啲內地旅客，喺外地畀當地人批評時，會反指佢哋之所以被批評，係因為當地人妒忌佢哋，係仇富同眼紅佢哋有錢。甚至有人會話，如果唔係佢哋啲內地人嚟買嘢，當地經濟早就玩完。
石永泰反駁，內地遊客到外地旅遊購物，買番嚟嘅係服務態度、信譽、品味同安全感，唔係一種施捨，唔明點解內地人會有呢種扭曲嘅概念，以為有錢就大晒。佢又話，留意到內地官方亦不時有此說法，話內地依家係強國、大國，有自信、有底氣，好多人等住賺中國嘅錢，唔知係咪呢啲語調，令到部分內地人過度自信，「一朝得志、語無倫次」喎。
鬧埋內地高官學者
講完內地遊客，石永泰又批評內地不斷有高官及學者，透過唔同渠道用一啲完全唔恰當、以及家長式嘅方法，講一啲同香港人生活方式同價值格格不入嘅嘢，令人感覺「不是太過良好」。
雖然石永泰嘅「牢騷」講中咗唔少香港人嘅心聲，不過話說回來，香港近年有人高舉龍獅旗同公然搞港獨，又有人發動「驅蝗」、「光復」等針對內地人嘅暴力示威衝擊，同樣令內地政府及人民感到好唔開心，唔明白香港人喺度搞緊乜。唔知石永泰會唔會搵日再度爆seed，鬧爆呢啲同樣不文明、「語無倫次」，甚至公然違法嘅香港人呢？