中環出更：誤按fb問題連結 一舊雲累街坊
隨着社交網站facebook（fb）嘅功能愈嚟愈多，好多人都鍾意喺fb流連，立法會議員黃碧雲（一舊雲）都唔例外。不過佢日前就因為唔小心打開咗fb上一條佢以為可以製作個人頭像嘅問題連結，連累近三千名朋友中招，搞到佢哋都收到相同連結。如果佢嘅朋友都打開連結，仲會產生連鎖效應，連累更多人中招。一舊雲呢鋪真係累街坊。
不過，講開問題連結，原來一舊雲老公都中過招，情況仲勁尷尬添。事緣佢老公喺fb收到一條連結，點知一按入去竟然連結咗去色情網站，仲自動透過fb發訊息畀朋友，話畀朋友知佢啱啱登入過咩色情網站，連色情級數都話埋畀人知。唯一好彩嘅係，一舊雲老公fb上嘅朋友唔係好多，而朋友收到後亦即刻通知佢，阻止尷尬事繼續蔓延落去。
隨便接受邀請 自嘲「濫交」
對於老公鬧出上色情網站嘅笑話，一舊雲唔單止無嬲，仲講笑話老公唔似自己咁「濫交」，即係唔會隨便接受交友邀請喎。一舊雲話，因為工作需要，基本上有朋友邀請就會接受，除非對方fb上有好多奇怪照片。不過經過今次事件，佢都會考慮提升fb保安級數，例如雙重認證，以免重蹈覆轍咁話。
卓妮