中環出更：佳節心願 鄔滿海恨飲新抱茶
中秋節係人月兩團圓嘅好日子，唔少男女都趁呢個機會，帶埋另一半返屋企慶祝，順便見埋家長！卓妮日前出席一個酒會時見到房屋協會主席鄔滿海，佢就自言中秋節除咗希望見到兩個仔返屋企陪佢慶祝，最想見到佢哋帶埋個女友，恨做老爺恨到發燒！
鄔滿海表示，每逢中秋都會食月餅應節，不過淨係敢食少少，怕膽固醇高喎！講講吓佢又自爆，兩個仔都已年過三十，但至今仍未成家立室，令佢哋啲老人家好心急。咁佢哋拍拖未呢？鄔滿海直言自己都唔知道，話呢啲事佢哋未必會同佢講，希望兩個仔「努力吓」。兩位細鄔生聽到喇！
吳秋北「發現」LED燈籠
卓妮又喺酒會上見到工聯會理事長吳秋北，佢話今年中秋會帶埋太太及三個小朋友，一齊返爺爺嫲嫲屋企過節，仲好期待嗰晚會食到傳統福建菜，例如煎蠔餅咁。佢又好似發現新大陸咁話，讀緊五年級嗰對孖女，舊年整咗啲傳統風琴式嘅燈籠架，但原來依家已經唔用蠟燭，改晒用安全啲嘅LED燈。其實類似產品已推出咗幾年，吳秋北似乎唔夠緊貼民情喎。
講開福建菜，本港兩大福建幫元老施子清同盧文端都有現身酒會，佢哋同卓妮講，每年都會同另一位福建幫元老楊孫西，三家人一齊慶祝中秋節。由於三人都兒孫滿堂，加埋有成四十幾人，去酒樓訂間房都唔夠大，最後要喺深灣遊艇會訂咗成個廳！不過，施子清自言近年由於鼻敏感，已經六年冇飲過酒，到時只能夠睇住盧文端同楊孫西飲。
卓妮