政情：中環出更：升官捷徑？ 葉劉不甘被當「跑道」
剛剛升任為政制及內地事務局副局長嘅陳岳鵬（Ronald），喺未加入政府之前，曾經同新民黨立法會議員、行政會議成員葉劉淑儀（葉劉）一齊創立匯賢智庫。葉劉日前祝福Ronald升職後，尋日接受電台訪問時忽然又話「心情複雜」，指Ronald加入政府後，有更多人搵佢，擔心有啲人係想搵佢做「跑道」加入政府喎！
陳岳鵬效應 多人想加盟
葉劉話，唔會話Ronald當佢係「跑道」加入政府，但自從Ronald加入政府後，有更多年輕人希望加入新民黨，而且發覺當中有啲人係想搵佢做「跑道」，所以需要同啲年輕人講清楚，到底呢班年輕人係利用佢嘅網絡、光環，去識人跟住入政府，定真正支持佢嘅理念喎。
其實到目前為止，應該只係得Ronald一個透過葉劉條「跑道」加入政府並「升官發財」，難保該黨仲有好多黨員係想借葉劉條「跑道」等機會「起飛」，究竟有幾多黨員係咁諗，相信葉劉真係要自己了解吓喇！作為黨主席，自己訓練出來嘅新人可以有更好更大嘅發展機會，桃李滿門，唔係應該感到自豪咩？