取消航班任佢噏 國泰醜聞鑊鑊甘

未入正題之前,先同大家講單新聞。話說早排英國一位旅客搭飛機去非洲維多利亞瀑布一個小鎮,點知上機至發現其他乘客全部冇到,就係因為咁,呢位幸運兒享受咗一程私人專機。

冇錯嘞,做生意講究義中取利,童叟無欺。可惜吖,醜聞纏身嘅國泰航空完全唔明白呢個道理。呢,佢哋一班原定尋日由香港飛日本關西機場嘅客機,無喇喇取消咗,乘客大失預算,有導遊因無法逐一通知團友,要如期到機場善後,搞到踢晒腳。即係咁,如果因為天氣等不可測嘅原因取消航班,乘客可以理解,但係國泰並冇解釋係乜原因,加上天氣等突發原因根本唔會預早通知,你慌唔係有人諗縮數,見載客量不足,索性取消航班,連油費都慳番咩。

嗱,呢啲咪叫輸打贏要囉。客多時有理冇理賣咗飛先算,發現唔夠位就將旅客當人球咁隨意擺布,家陣唔夠客,一句唔該就取消航班,簡直豈有此理。乘客真金白銀購買機票,等於同航空公司簽咗合同,航空公司點可以隨意毀約,就算有免責條款做擋箭牌,乜嘢商譽都丟清光喇,國泰嘅國際排名跌跌不休,咪就係咁解囉。

國泰對旅客呼之則來,揮之則去,唔怪得畀人批評衰過廉航。早排有團體調查全球四十多家航空公司航班準時情況,結果國泰排名尾九,仲低過本港另一家廉航。講真,國泰航班延誤當食生菜,本港唔少乘客固然身受其害,連台灣高官亦中招。上個月一批台灣考試院官員乘搭國泰航班前往芬蘭參加培訓課程,點知因為誤點而錯過首日行程,事後向國泰索償四十萬元新台幣。佢哋話喎,國泰漠視台灣旅客權益早有前科,今次要為同胞取回公道。

當然啦,航班延誤取消事小,旅客安全冇保障先至大鑊。國泰一班上周六由新西蘭飛返香港嘅航班,兩度發生故障,先係貨倉門損壞搞到乘客要重新登機,起飛時又因為引擎故障而要緊急煞停,好彩冇滑落海搞出人命咋。最慘係有乘客禍不單行,之前已經搭正食水含菌超標嘅國泰航班,加埋今次事件,坦言對國泰信心盡失,以後唔會幫襯喎。

點解國泰航空醜聞鑊鑊新鮮鑊鑊甘?咪因為管理混亂咯。逾百名國泰資深機師近日向管理層遞交聯署信,控訴飛行時數長期貼近民航處制訂指引嘅上限,搞到一個二個疲態畢露,有機師警告,長此下去遲早爆大鑊,問你怕未!

始終都係嗰句︰小心駛得萬年船,出行交通選擇多的是,無謂搵命博吖,係咪!

第一手消息請下載on.cc東網iPhone/iPad/Android/Windows Phone Apps