政情：公民講場：佔領失敗「周」圍卸膊

佔領行動一周年臨近，各方佔領搞手紛紛就行動失敗責任誰屬互相卸責。其中佔中發起人戴耀廷及陳健民日前率先放話，將行動失敗歸咎於拖延太耐、領導鬆散及胡亂將行動升級等因素，矛頭直指俗稱「雙學」嘅學聯同學民思潮。尋日又輪到學聯前秘書長周永康接受訪問，佢話雙學先後發起闖關求見京官同武力圍堵政總等升級行動，都係由各方力量逼出嘅政治決定。佢又話佔中三子建議退場，主要係睇佔領區外嘅民意，佢哋就要照顧佔領區內嘅人。人賴你、你賴人，最後變咗各方力量同所有佔領人士都要為佔領失敗負責，卸責功力仲高過特區政府呀！