政情:市道差 鍾國斌平租迎戰

立法會紡織及製衣界議員鍾國斌(Felix)近日去咗英國睇London Fashion Scout,並順道參觀咗電影哈利波特點樣製作。佢大讚哈利波特戲中有好多新意念同特別嘅戲服,但不忘指出香港電視業同時裝界都有好多人才,仲有好大發展潛力。

規模較細 唔怕蝕錢

講開時裝,有份搞九龍版元創方(PMQ)嘅Felix表示,雖然近日香港嘅市道轉差,但係九龍PMQ仍然預期會喺年底開業。Felix解釋,有啲生意人對產品有信心,反而會睇準個市唔好,揀定啲平租、地段又好嘅舖位。至於外面平租會否影響九龍PMQ嘅反應呢?佢就話如果個市真係太差,佢哋嘅租金可能再減幾個百分點,反正本身平租,基數唔大,唔會有大影響喎。

對於港島PMQ早前被揭現勁蝕千六萬,Felix指九龍PMQ規模較細,只有約一萬呎,加上喺深水埗區,租金會再平啲,預計頭一年會蝕錢,但唔會好似港島PMQ蝕咁多,而即使有設計師已排緊隊租用港島PMQ,都歡迎佢排九龍版。

第一手消息請下載on.cc東網iPhone/iPad/Android/Windows Phone Apps