污水倒灌 害慘平田邨住戶
安樂窩屢遭污水淹浸，住戶居不安寧！藍田平田邨一單位今年內三度發生污水倒灌事件，全屋家具被浸爛且黏滿排泄物，被迫全數報銷。惟每次事發期間，管理公司僅派員清理積水及疏通污水渠，卻未為住戶妥善解決污水倒灌及處理賠償。關注團體認為房屋署應勤加清理渠道，並改善索償制度，亦要主動調查事件，處罰違規棄置垃圾於污水渠的人士，還住戶一個安樂窩。
譚太為藍田平田邨低層住戶，單位今年先後三次出現污水倒灌，全屋家具多次被迫報銷。譚太憶述，今年三月首次出現污水倒灌，當時她在街外，污水灌滿全屋並滲出走廊才被發現，「管理處啲人打嚟話間屋浸晒水，拿拿臨趕返屋企，但啲傢俬已經浸晒，打開櫃桶，啲衫褲黏晒啲污糟嘢喺度，好臭、好核突！」
多次爭取終獲裝止回閥
因房署委派的公證行遲遲未處理索償，譚太只能自費更換全屋傢俬，「新買嘅傢俬都唔敢買有櫃桶，買啲離地嘅床同櫃，都驚會再浸過！」豈料八月一連兩日再次出現倒灌，譚太一家忙於清理污水，由於無法控制樓上其他住戶使用廁所，污水曾多次突然從坐廁湧出，「真係見住啲嘢湧出嚟，樓上去大去小都睇得出，三次喇，搞到我有陰影！」譚太不滿房署一直「懶懶閒」，幾經爭取才獲安裝止回閥，終有機會免除水浸危機。
平田邨物業服務辦事處發言人證實，過去一年三宗污水倒流均發生於上述單位，強調已協助戶主通渠及清理污水，並作全面清洗及消毒，並召喚高壓水車通渠。發言人指，三次污水倒流的原因與樓上住戶將大型垃圾沖進污水渠有關，已張貼通告及教育住戶正確使用排污設備。而就索償事宜，公證行現正跟進。
垃圾塞渠 住戶應被扣分
「當幢樓落成年期愈耐，沙井積聚雜物導致淤塞嘅機會就愈高，所以房署應該加緊清理沙井，而事發後嘅保障都不足，保險永遠賠唔足，個住戶真係好慘！」公屋聯會主席王坤直指，污水倒灌與住戶公德心有密切關係，衞生巾、舊布，甚至泥頭均為導致沙井淤塞的「常客」。王認為房署應在取得足夠證據情況下，向違例棄置垃圾於污水渠的住戶施行扣分制。王坤建議當局保留一名技工駐守，如遇突發事件可指導前線員工處理事件，減少污水倒灌對住戶造成的影響，並改善索償制度，增加保障。
記者：黃芷君