官僚靠得住，豬乸會上樹，呢句話真係一啲都冇錯。鉛水風波持續超過兩個月，港府至今闊佬懶理，查「鉛兇」查到無影無蹤，如果市民靠佢哋保障生命健康，咁就死得人多咯！
功夫茶唔係亂噏（口架），呢，鉛水事件爆發時，當局咪係威係勢成立三個委員會調查嘅，大家知唔知道有乜嘢進展吖？講起就火滾囉，事隔兩個多月，三個調查委員會仲喺度歎慢板，水務署嘅食水含鉛量專責小組拖到下星期至完成報告，房委會嘅公屋食水質量控制問題檢討委員會連幾時完成報告都未知，港府成立嘅獨立調查委員會更加連會都未開過，問你服未。古人話，三個和尚無水飲。今日港府三路查鉛水，港產官僚仲唔乘機你推我讓，卸得就卸咩！
救人如救火，盡快搵出污染源頭，對症下藥，係解決鉛禍嘅不二法門，港府一味歎慢板，同搵市民生命健康較飛冇分別。根據官方數字，至今超過一百名兒童驗出血鉛超標，當中八人確認智力遲緩，二十七人需要繼續跟進。當局早一日查出鉛兇，市民就可以早一日脫離鉛毒威脅，港產官僚如果真係急市民所急，調查工作又點會慢過龜爬？唔好忘記，查源頭只係化解危機嘅第一步，後面仲有好多措施需要跟進，以港府咁嘅進度，蚊都瞓、蛇都死喇。
家陣最頭痕嘅係，官僚敷衍塞責，加上投鼠忌器，隨時令調查工作難上加難。房委會轄下檢討委員會日前召開第六次會議，揭發公屋工程監管粗疏，甩漏處處，包括焊料採購無王管及地盤監督不足等重大漏洞，但係講到追究責任咯喎，當局即刻左閃右避，話要等埋水務署專責小組報告至有定奪喎。正如有人話齋，四大承建商幾乎壟斷全港公屋工程，如果遭受懲處例如除牌或者終止投標資格，隨時進一步拖慢興建公屋進度，影響整體房屋供應量，港府夠唔夠薑呢？再講吖，就算港府懾於民情，向承建商開刀，萬一因此拖慢公屋落成，最終受害嘅咪又係基層市民。
所以話，港產官僚冇嘢叻，最叻就係害人害物。呢，又有市民受害嘞，香港基督教服務處觀塘幼兒學校驗出食水含鉛量超標十倍，係首次有幼稚園中招。正正因為港府未能揪出鉛兇，禍水不斷蔓延，公屋、私樓、大學、中學唔在講，家陣連幼稚園都難以幸免，香港遲早淪為「毒港」吖。最好笑嘅係，港府連最基本嘅食水安全問題都搞唔掂，居然成日自誇「適度有為」，簡直唔知醜字點寫。老實講，港產官僚尸位素餐，搞到市民惶惶不可終日，到底係「適度有為」，定係「適度有害」吖。
總之，鉛水拆彈歎慢板，庸官劣吏民必反。港產官僚好自為之喇！