政情：今日你上鏡：工展攤位沽清 戴澤良感驚喜

中華廠商聯合會副會長兼展覽服務公司主席戴澤良（Tony）年初啱啱上任，首次擔大旗籌備工展會即遇上零售寒冬。Tony原本以為會幾棘手，點知展位出租情況好到出乎意料之外，唔止十二月喺維園登場嘅工展會展位迅速被搶晒，十月底喺葵涌舉行嘅食品嘉年華數百個攤位同樣供不應求。Tony話，商戶反應非常踴躍，仲爭做贊助商，佢哋嘅心態係反正冇乜生意，不如去工展會或嘉年華會博一博。