政情：鄧家彪捧愛女場 頻做主禮
工聯會（工記）立法會議員鄧家彪女兒鄧澄，學做大戲已一年幾，經常周圍去表演。鄧澄下周六喺大埔又有表演，將隨耀鳴聲劇團表演一段折子戲，扮演《紫釵記》入面嘅霍小玉。正所謂賣花讚花香，鄧家彪都大讚個女造型超得意喎！
奔走大埔社區會堂
鄧家彪話，個女一星期練習兩次，佢平日唔得閒陪個女練，都要麻煩太太幫手。所以若囡囡有表演，佢都盡量抽時間去支持。咁啱囡囡所屬劇團成日喺大埔演出，所以鄧家彪呢年半已經奔走大埔區多個社區會堂，熟晒地頭。
不過，工記喺呢區完全冇區議員，而呢啲活動多數係民建聯（民記）搞嘅，有時民記區議員見佢早到，仲會叫佢幫手做主禮嘉賓添！作為一個工記議員反而成日幫民記主禮，真係蝕底又尷尬喇！