政情：長江不甘做芬姐副手

梁：唔會堅持做足四年

司法委員會主席過往一直由泛民主派擔任，直至今屆建制派建議與泛民各做兩年，但泛民就聲言要霸足四年，協調失敗下最終變成建制派做足四年。而根據建制派當年嘅協定，呢個位頭兩年由Priscilla擔任，之後兩年就由Martin接任。不過，去到第三年開始前，據聞有人提出因佔領行動與政改方案表決臨近，最好搵一個有經驗嘅人擔任呢個位，結果Priscilla再度連任。

早前建制派討論第四年嘅委員會正副主席分配時，有人又要求畀Priscilla再做一年，即立法會四年任期都由佢擔任主席，並建議Martin改任副主席。據聞Martin知道件事後頗為氣憤，聲言「寧願乜都冇得做」，都一定唔會做「阿芬姐」嘅副手！近日Martin仲四出向其他建制派拉票。據聞唔少建制派都支持維持原來協定，由Martin接掌司法委員會。形勢比人強，Priscilla尋日就喺電台表示，如果Martin真係想做主席，佢亦唔會堅持喎。

房屋戰線 工記預咗爭輸

至於房屋事務委員會主席之爭，據聞工聯會內部認為，麥美娟做主席已經上手，加上鍾樹根已擔任監察西九文化區小組委員會主席，無理由一人霸兩個位，好應該畀麥美娟連任。不過，工聯會亦打定輸數，因為該會議員不足以抗衡人多勢眾嘅民建聯，但亦想將事件公開，由公眾評論。