立法會復會在即，泛民同建制派早已就各委員會正副主席爆發爭奪戰，不過牽涉喺呢場爭奪戰之中嘅，仲有立會秘書處。事關現時仍有唔少議員透過傳真報名加入委員會，但係傳真機若jam紙或出現技術問題，無法及時收到而過咗截止報名日期，議員就無法加入相關委員會。聽講秘書處不時因此同議員有拗撬，搞到頭都大埋，正考慮係咪停用傳真機。
原本泛民同建制會協調來年各委員會嘅正副主席安排，但上個會期泛民突襲取得人事編制及工務兩個小組委員會控制權，令建制派忿忿不平，計劃今個會期包攬晒。惟建制派內部亦爆出內訌，內會、房屋及司法事務委員會先後出現爭位情況。
因競爭激烈，據聞秘書處為此相當頭痛，有人提議改用電郵報名。不過，用電郵就會衍生出保安問題，亦唔知係以議員發出或秘書處收到電郵嘅時間為準，分分鐘仲複雜。睇嚟泛民同建制嘅立會委員爭奪戰，最快玩殘嘅應該係秘書處。
卓妮