中環出更：台靚女廚神 居港分甘同味
人在異鄉，總係零舍懷念家鄉餸。香港台灣婦女協會早前舉行周年大會及午宴，協會會長林華琴（Judy）特登邀請居港五年嘅台灣美女廚神Jennifer分享煮嘢心得。Jennifer話，初時佢經常由台灣搬嘢返港煮台灣菜，行李篋裝滿豉油等調味料，後來的起心肝學煮香港菜，發現醬料好重要，仲因此發現唔少隱世美味醬料。當日佢逐一同姊妹分享，聽得大家津津有味，仲叫Jennifer快啲將食譜譯成英文，方便畀家傭照辦煮碗喎！
Judy話，佢一直想搵多啲旅港台灣年輕人加入，為協會注入新血，早前喺社交網站發現經常發表煮餸心得、有數以萬計粉絲追隨嘅Jennifer。Judy後尾知道Jennifer係台灣人，即眼前一亮。
蔣震妻獨愛家鄉寶島風味
原本喺私募基金工作嘅Jennifer笑笑口話，初時諗住嚟香港賺大錢，結果嫁畀印度籍丈夫，從此變成家庭主婦，於是開始學煮餸並擺上網分享，仲出版咗本暢銷食譜添！
當日台灣同鄉會顧問會長賴李承美、工業家蔣震太太馬榮華都喺度。馬榮華透露，來港幾十年，依家都仲會帶台灣豉油等調味料返港，因為始終喜歡家鄉味道。
此外，同蔣震女兒蔣麗萍一齊發起成立關注內地留守兒童「愛基金」嘅保良局前主席陳亨利太太陳趙滿菊亦有到場，佢話今個暑假「愛基金」資助內地五百多個機構開暑假班，共有五萬名孩童受惠，冀喚起社會關注，齊為內地留守兒童送暖。
卓妮