中環出更：人走茶涼 發叔銅像「起斑」
外號「新界王」嘅立法會議員劉皇發（發叔），由八十年代開始出任鄉議局主席，直至今年先退下火線，其大仔劉業強（Kenneth）就喺無競爭嘅情況下自動當選為主席。發叔在位鄉議局期間算係壓得住場，但自從佢退落嚟，部分鄉頭又開始按捺不住，喺尋日嘅鄉議局執委會會議上催逼Kenneth為新界居民發聲，處理丁屋及僭建等棘手問題。卓妮仲發現，一直屹立鄉議局大樓嘅發叔銅像起晒銅綠都無人理，果然係人走茶涼。
大仔劉業強畀鄉紳質問
屏山鄉事委員會主席曾樹和尋日突然喺會議途中向Kenneth「考牌」，質問對方點樣幫新界居民同政府周旋，處理僭建、土地等問題。佢愈講愈激動，仲提議必要時組織五千人搞抗爭行動，「為新界人創造奇迹，拎番自己嘅嘢」。其後錦田鄉委會主席鄧賀年、十八鄉鄉委會主席梁福元都加入戰團，後者話鄉議局副主席張學明身兼行政會議成員，理應幫手同政府嗰邊傾吓。Kenneth會後坦言，政府依家確係少咗諮詢鄉事派喎。
除咗搞抗爭，上水鄉事委員會主席侯志強亦因應臨近中秋節，建議用公數為廿七鄉每鄉買一百盒雙黃白蓮蓉月餅，另買一百盒供委員及職員享用，後來仲話買夠三千盒添！若以二百元一盒計算，約花六十萬元，難怪鄉局入不敷支喇！