中環出更：華商評新一代 台港大不同
以台商為主嘅國際華商協進會早前舉行換屆及周年晚宴，卸任嘅前會長陳趙滿菊交棒畀新任會長羅台秦（Louisa），唔少政商界人士齊出席撐場，包括台北經濟文化辦事處處長嚴重光、華商會前會長李嘉音、中華廠商聯合會副會長陳淑玲等人。咁啱過去一年台港兩地都有大型學生運動，影響兩地營商環境，卓妮梗係要問吓大家對兩地年輕人嘅睇法。
新加入華商會做理事嘅廠商會會董吳國安（安哥）話，上一代港青識得利用暑假賺錢幫補學費，但依家港青喺溫室長大，父母太過呵護備至，唔單止暑假唔使打工，仲有大把機會去遊學，有啲父母仲恨不得搵工人陪住去，真係今時唔同往日。安哥喺台灣投資多年，佢覺得當地後生仔做嘢專注、細心，亦保留住中國文化，與港青大不同。
籌辦兩岸三地學生領袖比賽
廠商會會董孫榮良就認為，呢一代港青比較自我，做事欠缺國際視野，又唔肯放下身段到大陸發展，自然令發展受限。
講番就職禮，Louisa話，上任後將致力促進全球華商與海峽兩岸經貿嘅交流合作，例如探討如何喺「一帶一路」所蘊藏嘅巨大商機中，搵出兩岸四地合作嘅機會。
此外，該會亦會撥出資源舉辦針對兩岸三地青少年嘅活動，例如正在籌辦中港台學生領袖比賽，參賽者係於本港大學就讀嘅內地、台灣及本地生，到時大家就可以窺探三地青年不同嘅特質，亦趁機拉近三地青年嘅距離。
卓妮