政情：徐英偉貼相疑暗撐郭振華
區議會選舉十一月舉行，除咗泛民與「傘兵」喺多區互撼，建制派於多個選區亦未能成功協調，其中一個焦點選區為深水埗又一村。之前有消息話當區現任區議員、身兼深水埗區議會主席嘅郭振華會棄選，讓位畀自由黨青年團主席李梓敬，與社民連嘅周嘉發一對一決戰，但其後又有澄清指郭仍未言退。民政事務局政治助理徐英偉（Caspar）近日就喺社交網站上載兩個囝囝與郭振華嘅合照，令人聯想Caspar係咪暗撐郭振華繼續參選連任，與同政府一向唔咬弦嘅自由黨撼過。
區選臨近 兩子與郭合照
其實Caspar本身都係又一村居民，佢日前上載嗰兩張相片，顯示兩個囝囝喺郭振華手上接過「全城清潔2015」嘅紀念品，似乎係宣傳全城清潔多過支持郭參選。不過有地區消息指出，郭根本並無退意，早前有人傳佢棄選可能只係煙幕，因此今次呢張合照亦多少有闢謠之用。究竟最後郭同李邊個會被勸退，定係兩人都堅持參選，由得泛民坐收漁人之利，相信好快就會揭曉。