上水鄉事委員會主席侯志強可以話係野生動物嘅剋星，除試過徒手捉蛇同打野豬，原來仲不時潛水打魚。早前佢就揸船去到塔門，瞓一晚後喺天光潛水打魚，最後捉咗成八、九條大魚，加埋百幾斤！相中可見佢右手一條黃立（魚倉），左手一條海虎斑（圖）。
侯志強又教路話，試過有次捉魚遇上鯊魚，好彩佢夠鎮定，用腦電波同對方講：「大海咁多美食，唔一定要揀我吖？」結果條鯊魚真係掉頭走咗。不過佢最後都補充一句，話遇到鯊魚最緊要都係手執魚槍，保護自己。
講完威水史又要講下瘀事，侯志強話試過喺馬來西亞畀人氹佢用近二萬元港幣，買咗條名為「忘不了」嘅魚，結果食落陣味同鯇魚冇乜分別，認真搵笨！呢個經歷令佢至今都忘不了。
