中環出更：卿姐鬧城壇新主持「傻仔」
港台節目《城市論壇》抖完暑尋日重新「開壇」，立即擦出火花，不過今次並非嘉賓講者互罵，而係其中一位嘉賓民主黨主席劉慧卿（卿姐）唔小心講錯嘢，畀論壇嘅新主持蘇敬恆糾正時，卿姐反斥對方「傻仔」！卿姐唔止對呢位新主持好好火，喺論壇上仲大罵全國港澳研究會副會長劉兆佳嘅「忠誠反對派」言論，叫對方「去瞓喇」，又炮轟另一嘉賓講者周浩鼎所屬嘅民建聯，冇向中央反映港人嘅真正聲音，嚇到周浩鼎手都震埋。
失言後即場道歉
尋日嘅討論議題係民主黨密會京官事件，卿姐講到中央同香港嘅憲制地位時，突然爆咗一句「香港係中華民國嘅一部分！」蘇敬恆已經冇即時指正佢，等到卿姐差唔多講完，佢先提醒對方係咪其實想講「中華人民共和國」。卿姐衝口而出咁話蘇敬恆係「傻仔」，強調「我梗係識分」！
不過，卿姐其後知道自己講錯嘢，已即場及透過社交網站向蘇敬恆致歉。佢自言用「傻仔」嚟形容別人係佢嘅口頭禪，平日都會用嚟稱呼自己啲黨友，強調當時佢並無惡意，以後真係要改下。