中環出更：陳繁昌自爆迎新營獻唱
踏入九月，各大專院校嘅迎新營都進行得七七八八，仲記得每年嘅大學迎新營，部分內容都會引起爭議。適逢尋日係新一季馬季開鑼，卓妮撞到香港科技大學校長陳繁昌，佢面帶笑容力撐自己嘅學生一向都咁乖，並透露今年參加科大迎新營時將會表演唱歌！另一邊廂，港大學術、人事及資源副校長任命風波鬧得滿城風雨，同場現身嘅港大校務委員會主席梁智鴻仍然氣定神閒，相信一眾校委將以港大利益為依歸作決定。
開鑼日，好多名人都有入沙田馬場湊熱鬧，包括財經事務及庫務局局長陳家強夫婦、保良局前主席鄭錦鐘、東華三院前主席施榮恆及莎莎國際主席郭少明等。
囝細妻嫩 劉燊濤拒打擂台
其中少有入馬場嘅陳繁昌，講開科大迎新營就眉飛色舞，因為佢今年將表演唱歌。原來唔講唔知，佢年輕讀中學時已有唱開民歌，仲會拎埋結他自彈自唱。不過佢笑言，今次於迎新營只會齋唱，留番下次先彈結他。
同場仲有工業總會名譽會長劉展灝嘅兒子、飛騰錶業品牌經理劉燊濤（Gary），就講及自己嘅健康心得。佢自言打咗泰拳一段時間，覺得身體健康咗；當被問及會否打算挑戰自己上擂台，Gary即時望住身旁嘅太太吳奕筠，表示唔會考慮住，免得太太同家人擔心，反而會等小朋友大個啲，睇吓對方有冇興趣玩吓咁話。
馬會一批大董亦有現身支持開鑼日，其中馬會副主席周永健知悉，今年整體經濟情況一般，加上受多種因素影響下，佢期望今年投注額可以同去年相若，就已經覺得滿意。