中環出更：湯文亮「找數」體育界撐場
因「細價樓爆煲論」而人氣急升嘅紀惠集團行政總裁湯文亮，早前因樓價不跌反升而喺灣仔一間富豪飯堂請客認輸。當晚投資界高手雲集唔使講，不過最特別係一班體育界新星亦係座上客，包括年僅十八歲嘅香港女子青年跳遠紀錄保持者陳家倩，可見身兼灣仔體育總會會長嘅湯文亮確係好支持體育。湯文亮自言好鍾意運動，最愛羽毛球及壁球。佢嘅女兒仁濟醫院總理湯振玲（Jacqueline）就笑稱，早幾日先同爸爸打波，全家都唔夠佢打喎！
灣仔體育總會執委兼義務秘書何佩犀、執委廖志強及甲組足球隊灣仔隊一班球員都有到場。曾經係香港撐竿跳高紀錄保持者嘅廖志強，現時係陳家倩嘅教練，佢對家倩嘅前景十分睇好，形容咁好嘅運動員係可遇不可求。
愛女帶男友現身飯局
當晚湯文亮太太、兒子湯振傑夫婦都有到場，卓妮見有位斯文男士成晚傍住Jacqueline滿場飛，唔通係真命天子？Jacqueline笑笑口承認，仲大方介紹男友Charles畀卓妮識。Jacqueline後生、靚女加上家底唔錯，要搵門當戶對嘅男友確係唔容易，不過原來佢揀男友最難嘅條件竟然係要識得接佢講嘅冷笑話喎！
講返晚宴雖然係認輸宴，但係現時樓價已出現減價成交個案，湯文亮係咪輸家仲未知。佢勸大家買樓小心啲，仲話依家股市跌及人民幣貶值，投資市場風高浪急，投資者謹記安全至上。
卓妮