政客變臉真係變得快，喺佔領行動期間及政改方案否決前，絕大部分泛民政黨都視見京官如見鬼，唔係誓神劈願話老死不相往來，就係為會面訂下種種前設，包括要中央先撤回人大「八三一」決定、或者會面一定要公開進行、要正式開會唔可以食飯飲茶咁親密等。不過，隨着佔領清場、政改否決及區議會選舉臨近，各大泛民黨派齊齊變晒臉，排晒隊乞求見京官，當全港市民失晒憶咁。
民主黨（白鴿黨）多名領導層早前喺香港密會港澳辦副主任馮巍，討論包括政改等議題，事前冇向公眾預告會面，亦冇私下知會其他泛民有此會面。泛民「飯盒會」尋日召開特別會議討論事件，最初仲以為公民黨等激進派會圍攻白鴿黨，狠批佢哋又再同中央「密室談判」、「賣港求榮」等，但出乎意料，會後各黨派代表竟然話尊重白鴿黨嘅做法。
其中公民黨黨魁梁家傑仲話，為免中央偏聽而誤判香港形勢，泛民支持喺互相尊重嘅基礎下與中央保持溝通。對於白鴿黨事前冇通知其他黨派，佢僅稱會加強泛民之間嘅溝通，唔敢批評半句。
反而白鴿黨主席劉慧卿就「將軍」其他泛民，話如果其他泛民認為應事前公開與京官嘅會面，佢好歡迎中央咁做。眾所周知，中央根本就唔會同公民黨等激進泛民會面溝通，就算肯見都一定唔可以事前公開，否則只會令會面告吹，更加變成只得白鴿黨可獨見京官。卿姐果然高招！
卓妮