有位小說家認為，人生很多東西都是有配額的。他說他寫了好幾百本小說，以前一天可寫逾一萬字，如今連三百字的東西都寫不出來，是以他認為其寫作靈感現用完了。老朽年輕時對其所言嗤之以鼻，現在年紀愈大愈相信人生——確實有許多東西是有配額的，譬如暴飲暴食變成一日三次吞遏制糖尿、血壓、膽固醇的藥丸，暴飲暴食變成小心飲食！
老朽由此想到：香港這個「福地」，以前歲月靜好，獅子山下的平民百姓，即使窮，也活得樂觀積極，社會安寧，個個肯捱肯拚，社會沒有甚麼噪音，遑論激烈抗爭，衝擊政府政要！
回歸十八年，經歷董伯伯、貪曾、ＣＹ——可謂有亂無治！一單鉛水風波都搞成政治危機，中招屋邨及學校不斷增加，政府一味得個「慌」字：一時換水喉，一時裝濾水器，一時為居民驗血，一時成立獨立委員會調查，忙到打晒困籠死結，卻是姿勢多於實際，既搵唔到源頭，又怎能有效化解危機呢？結果市民見到政府嘅「管治團隊」，除了垃圾桶、飯桶，就係癡癡呆呆坐埋一枱，戇戇居居圍埋一堆！
嗱！唔係謬讚本報「探射燈」，記者前往澳門、深圳、廣州、上海及台灣抽取共二十二個食水樣本，一驗之下發現人哋冇事，唯獨香港水喉焊料含鉛量超標近九百五十倍，好明顯港府懶管，「安於虛榮」，居安不思危，加上監察混亂，所以搞出個鉛水危機！
香港呢個「福地」，在近年的各項國際評比中，排名幾乎全線下跌，尤其居住環境日益惡化，「宜居」排名跌跌不休。鬼咩！飲啖水驚中鉛毒，聽個電話都驚畀人呃，唔去旅行都買唔起居屋劏房……話「福地」嘅配額唔係用完，你用炮決威嚇老朽都唔信喇！