政情：區議員「成功爭取」街市變超市
「成功爭取」係唔少區議員嘅共同語言。公民力量沙田區議員鄧永昌於今屆區議會選舉嘅傳單上，提到自己曾「成功爭取美田邨興建街市」，但實情係美田邨至今仍未有街市，只有超級市場供市民選購日用品。
聲稱對招標過程不知情
對於被翻舊帳發現早年爭取興建街市變超市，鄧話呢個係「抹黑行動嘅開始」，又話自己對招標過程不知情，只知房署無兌現承諾。因此，佢多次喺屋邨管理諮詢委員會上提質詢，而署方解釋係現時消費模式轉變，相信超市、便利店等能滿足需求，加上鄰近大圍街市同美林街市出租率不理想，所以無喺美田邨興建街市。
鄧永昌其後更為街市兩個字重新定義，認為唔一定係傳統街市才稱得上街市，但同一時間疑似補飛，表示會喺超市租約期滿後，爭取將現址改建為街市，未知當區居民到時又會否收貨呢？