政情：港大風波泰憤怒
最近一套動畫掀起各方熱烈討論，講述每人由幾種情緒影響或指揮日常生活，不論大小朋友都有共鳴或反思，連大律師公會前主席石永泰都唔例外。佢話做咗兩次測試，自認係「阿燥」（Anger），即為人暴躁易怒，其後即時上身就港大副校長任命風波開腔，而且各打五十大板，批評港大校務委員會同學生代表均有做得唔合理嘅地方，認真火氣十足。
無打算去畢業生會議
港大學生會會長馮敬恩等學生及一批示威者，於七月底衝擊港大校委會會議，引起社會批評質疑，及至八月下旬嘅校委會會議，校委會決定不再「等埋首席副校」，主席梁智鴻指本月會討論副校長人選建議，適逢港大畢業生議會會議今日舉行，預料支持盡快任命副校長及支持十大院長聲明嘅陣營會有一場角力。自稱三十年前入讀法律系嘅石永泰，亦趁同一眾港大法律系新生作出分享時，提及港大副校長任命風波。
對兩極化社會感失望
港大法律學院尋日舉行開學禮，石永泰發言時首先話今日無打算參與港大畢業生議會會議，亦無打算投票，所以可以自由講句公道說話。佢批評，校委會「等埋首席副校」嘅決定，形容係有違常識，又指如果覺得唔同意有關人選，一係就向遴選委員會退回人選，又或者拒絕任命。
石永泰一鬧就停唔到口，其後亦批評學生都有唔啱嘅地方，強調學生做嘅行動要有正當性，如果以要反抗「制度暴力」為理由衝入校委會會議，係好危險嘅事，直言兩個錯誤係唔會令件事變得正確。不過，對於學生嘅行為持唔同意見就畀網民批評，石認為兩極化嘅社會令佢好失望，情況同佔領行動後期其實都好相似。
儘管石永泰口講自己有憤怒基因，又意有所指話識嬲都係一件好事，仲叫港人珍惜憤怒嘅機會。但之後佢話題一轉，同一班來自內地嘅學生講，香港嘅資訊自由比內地多，至少香港唔需要翻牆先可以睇唔同網頁，希望佢哋可以好好利用依個優勢。照咁睇，石永泰都有樂觀嘅一面，唔會畀憤怒基因大過天！