中環出更：盧文端自爆借酒偷師
為咗促成一單生意，或者學做生意秘訣，大家可以去到幾盡？早前兩名福建幫頭領，福建社團聯會永遠名譽會長盧文端同楊孫西一同出席活動，二人非常老友已係政圈嘅公開秘密。盧文端爆料，自己飲酒係同楊孫西有關，笑言以前想請教做生意秘訣時，楊孫西成日都唔肯講，要摸住酒杯底再問，情況先有啲唔同喎。
早前一批愛酒之人出席一個展覽暨晚宴活動，期間楊孫西講起佢首次與酒結緣，原來係佢第一年出來社會工作，當時佢跟老闆應酬，年少嘅佢自此對茅台印象深刻。
楊孫西暢飲後易揭秘
不過，楊孫西同時自爆，飲完酒會變得比平時幽默及健談，連平時唔想講嘅嘢都會講埋出嚟，所以想知秘密記得喺呢個時候問佢喇！至於身旁同為福建幫頭領嘅施子清，自言年紀大咗，近六年飲完酒都有啲敏感，所以最近都少飲咗。
展覽現場又展出唔少特別設計嘅酒樽。一向收藏唔少靚酒嘅保良局前主席鄭錦鐘透露，早前發現有朋友專做「個性化」訂製嘅茅台，可以度身訂造一支屬於自己嘅茅台，除咗樽身寫有佢全名，仲可以親自挑選酒樽上提字嘅字句，認為好有收藏價值。
同場仲有菁英會成員潘凱特、李曠怡及王智誠、卓能集團非執董趙式浩及「香港手套大王」詹氏第二代詹嘉莉（Kelly）等人，其中李曠怡及趙式浩異口同聲話，飲酒其實係「飲個氣氛」，享受同朋友歡聚嘅時間；近年涉足美容界嘅Kelly就剛從新疆回港，正開拓適用於唔同城市或省份天氣嘅化妝品。
卓妮