中環出更：乳鴿區議員 勢選舉前退黨
民主黨（白鴿黨）預計年底派出九十四人參選區議會，但選舉未到就已經損兵折將。白鴿黨新界東支部早前爆出派系鬥爭，「乳鴿」沙田區議員麥潤培被指得罪人多，被黨內前線派系封殺。
選區現「搣柴」橫額
該黨中委會前日否決麥潤培今年十一月以白鴿黨名義出戰區選。雖然佢可以上訴，但預料推翻機會不大，所以佢好大機會最後要退黨參選。預料白鴿黨未有議席進帳前，已經少個現任區議員。
麥潤培話，未知會否參選，但對於以白鴿黨名義出選有信心，暫不考慮以其他名義參選。不過，我哋發現麥潤培在所屬馬鞍山利安邨選區懸掛的宣傳橫額已經自動「搣柴」，白鴿黨黨徽不再出現在橫額上，反而換上他自行成立的青少年團體「青靜動力」的標誌。未知他是否已經預知出選無望，先自動「搣柴」，然後靜待時機宣布退黨呢？
除咗麥潤培，上屆選舉代表白鴿黨出選大埔富亨選區嘅任萬全，當年僅敗畀民建聯王秋北，唔少黨友都睇好佢有望挑戰成功。不過，任萬全就話覺得白鴿黨理念同自己愈走愈遠，唔肯年輕化，政治立場又唔硬，寧願退黨用獨立人士身份參選，用個人政績爭取議席。
卓妮