公民講場：倡合約工時 愈傾愈退步

標準工時委員會引述政府經濟顧問嘅研究報告指，若落實勞工界要求嘅每周四十四小時標準工時，以及超時補水一倍半人工計算，會令企業增加逾一百億元薪酬成本。標時委員會資方委員劉展灝尋日喺電台借勢表示，有關數字相當驚人，會令本港企業大受打擊。佢又認為難以劃一不同類別僱員嘅工作時數，建議僱傭雙方透過磋商簽訂合約工時，代替立法制訂標準工時。如果透過磋商可以搞得掂，就根本連合約都唔使啦，當初更加唔會建議立法，估唔到愈研究愈返轉頭。