政情：煽動學生衝擊 教協焚身
今個暑假認真多風波，除咗有蔓延緊嘅鉛水事件，港大學生衝擊校委會亦餘波未了，兩件事都引起社會好大回響，唔少政黨都好落力參與其中，希望增加嚟緊區議會選舉嘅勝算。可惜最新一項調查顯示，本港十五個主要政團中，有十四個政團嘅評分都較上次下跌，真係慘不忍睹。被指煽動學生衝擊港大校委會嘅教協，評分就比上次跌咗零點一六分，形象插水真係撥火變「搶火」燒埋自己。
香港研究協會喺八月十七至廿一日期間，訪問咗一千零八十八名市民，了解佢哋對立法會內十五個政團嘅支持度，以及就佢哋嘅表現進行評分。結果顯示，排名第三嘅自由黨跌幅最勁，比上次跌咗零點一九分；其次就係排名第六嘅街工，跌咗零點一七分；至於排名第一嘅教協，就下跌咗零點一六分，相信係同教協副會長兼教育界立法會議員葉建源被指煽動學生衝擊港大校委會有關。
其實之前已經有唔少人質疑，身為港大校友嘅葉建源涉嫌縱容衝擊校委會嘅學生，有團體仲發起請願，以示不滿。
不過，葉建源並無因為外界嘅不滿聲音而變得低調，尋日接受電台訪問時更話，擔心政府已經全面控制校委會，透過委任校外人士為委員干預副校長嘅任命，又批評有關做法違反院校自主同學術自由。
政府控制校委會論 無根據
教育局隨即反駁葉建源嘅指控全無事實根據，現時港大校委會內共有二十四個席位，其中只有主席同六名委員由作為校監嘅特首委任，其餘則由校委會、校董會、教員、職員、學生及研究生委任或互選產生，而本屆校監只委任咗新校務委員。
無論從校委會成員比例或本屆校監任命人數，話「政府已全面控制校委會」係無事實根據。其實再咁搞落去，教協形象同評分繼續插水就事小，連累港大聲譽嚴重受損先至事大。