質疑去錯選區挑機
今次越級挑戰嘅周炫瑋，讀大學時係划艇隊隊員，佢話如果同根叔鬥划艇未必會輸，仲希望憑着自己嘅划艇底子，可以同街坊多啲話題；而以前做運動員嘅艱苦訓練，亦有助佢現時每朝落區擺街站都唔怕辛苦。對於有後生仔挑戰，根叔就氣定神閒話：「周先生係唔係搞錯咗呀？我嗰區得好少水上人喎，要打入水上人社區應該打隔籬區就真！呢度有咩都唔知，即係對地區唔認識啦！」
講到自己有咩優勝之處，根叔話擔任廿幾年區議員，街坊有眼見，「我唔會車大炮、講大話，只會做實務！街坊叫我唔好走，我就唔會走！」言談間完全感受到根叔充滿戰意同信心，睇來艇仔要擊倒大船都唔容易。
卓妮