中環出更：議員搶米袋 輸人又輸陣
香港潮屬社團總會趁尋日盂蘭節，首次喺香港舉辦「搶孤」比賽，即係參賽者要企喺台上掟迷你米袋，對手就要用大型竹簍搶接，地點就揀咗觀塘康寧道遊樂場。幾位立法會議員同潮屬社團總會成員都有落場參加「冠軍邀請賽」，同「搶孤」冠軍隊鬥過。睇一班議員個個出盡力搶米袋，莫非想同餓鬼爭食？
漁農界何俊賢（高佬賢）、陳克勤、旅遊界姚思榮都話要抱住必贏嘅決心，但鍾樹根就話志在參與。「志在參與」嘅樹根仲着住恤衫、西褲同皮鞋，後尾話驚爆呔，做吓後備就算喎！加上蔣麗芸去咗深圳，趕唔切返港，議員隊未出戰就差啲甩轆唔夠人，搞到要向對手潮屬社團總會，借咗會董馬軼超臨時加入幫拖。
高佬賢 樹根「偷雞」被扣分
比賽開始嗰陣，高佬賢首輪企喺較後嘅位置，結果淨係搶到六個米袋。吸取首輪經驗後，佢次輪就衝到最前，勁搶十三個米袋，但期間都唔小心跌咗啲出嚟。克勤亦非常投入，同隊友、對手偶有碰撞。而姚思榮就一直守住外圍位置，接側邊嗰啲米袋，所以收穫唔多，兩輪加埋只接得兩個米袋。
輪到議員隊掟米袋嗰陣，樹根就有上場喇，高佬賢同樹根特登掟到勁近，博對手唔夠手長接唔到，點知反而搞到自己掟唔中範圍，倒扣成十二分，偷雞唔到蝕渣米！
潮屬社團總會方面，身形較有分量嘅會董陳光明亦搶佔最前位置，意圖盡搶米袋。不過，常務會董劉文文就唔太專心，比賽中途突然戴太陽眼鏡，佢事後解釋係唔記得先擺好副眼鏡，又驚跌落地，只好戴起。
最終由冠軍隊再下一城，兩隊「業餘」嘅議員隊同潮屬社團總會隊分別得第二及第三名，輸咗超過二十分。未知明年如果再有相同賽事，佢哋會唔會練多啲先參加呢？
其實盂蘭節搶米袋，會唔會變成同餓鬼爭食，唔太吉利呢？盂蘭文化節競賽總統籌胡炎松話，呢啲講法會誤解，因為搶孤用嘅祭品，已經由孤魂野鬼吸食靈氣，之後先畀人食，唔會唔吉利。
卓妮