政情:沈祖堯切瘜肉諗埋後事

俗語話「針唔拮到肉唔知痛」,相信中文大學校長沈祖堯最近應該對呢句說話感受良多。話說佢啱啱過咗五十五歲,尋日首次接受咗大腸內窺鏡檢查及瘜肉切除手術,之後就喺網誌上分享感受,話接受手術前重新審視個人價值觀同重視嘅嘢,例如不幸發現腫瘤,應該點樣安置家人、離開前要完成咩工作等,言談之間講到生離死別咁。

平日神態自若嘅沈祖堯,喺網誌上講到自己用咗兩個月時間考慮做唔做呢個手術,到手術當日領悟到瞓喺病床上失去自主權,「氧氣管插進我的鼻孔、血壓計繞着我的臂、脈搏血氧儀夾着我的手指」,仲諗到如果醒唔番咁點算,唔知仲以為佢係做咩大手術。

應承太太充實生活

沈祖堯又話,「在生與死的疑惑面前」,佢重新審視自己嘅價值觀,又同太太講起人生好似大自然四季,依家正值金秋,眨吓眼就走進人生嘅嚴冬,所以承諾會充實咁過每一日,將每日視作人生最後一日喎。其實普遍醫生建議,四十歲起就應該定期做大腸檢查,沈祖堯依家先肯做,唔通佢諱疾忌醫?

第一手消息請下載on.cc東網iPhone/iPad/Android/Windows Phone Apps