港府一向九唔搭八，廢柴當沉香，沉香當廢柴。好似周一鑊咁吖，出名廢柴，偏偏港府如獲至寶，循環再用；反而園林廢物明明可以循環再用，偏偏港府棄如草芥，你話係咪嘥料吖？
唔講唔知道，原來香港每日丟棄嘅園林廢物多達一百五十四噸，棄置量比膠樽高出近兩成，都咪話唔誇張。○九年園林廢物棄置量不過二萬九千幾噸，一三年已暴升至五萬六千幾噸，升幅達八成七，而且港府仲係製造園林廢物嘅最大元兇添。
當局為咗美化市容，廣植花草樹木，本來無可厚非，問題係花草樹木亦有凋零嘅一日，特別係港府管樹無能，話就話有樹木辦，實際上形同虛設，搞到塌樹事故不絕如縷。呢，上月般咸道石牆一棵細葉榕因為天雨關係而倒塌，之後路政署快刀斬亂麻，將其餘四棵細葉榕斬立決，製造無數園林廢物，通通被送往堆填區。不可不知，除咗路政署，建築署、渠務署、地政總署、食環署、房屋署及康文署等部門，一樣將園林廢物送去堆填，唔怪得堆填區多多都唔夠用喇。
咪以為園林廢物等於垃圾，可以一棄了之，其實只要稍加處理，就可以轉廢為能。樹木專家係咁講嘅，本港有大量園圃需要施肥，回收園林廢物可作堆肥之用。而且收集園林廢物一啲都唔難，只要喺社區開闢設施就可以自行製作堆肥，例如康文署嘅公園可以增建堆肥設施自給自足，既方便，又環保。
可惜吖，港產官僚搞環保一直得把口。環境局去年發表《香港廚餘及園林廢物計劃》，發展局其後再推出《減少和處理園林廢物指引》，要求政府部門帶頭制訂園林廢物分類及收集方法，點知兩份文件推出超過一年，政府部門依然闊佬懶理，關人個關，至今仍未制訂實務守則，港產官僚有冇誠意推動環保，唔使講都知喇。
港府成日要求市民將垃圾分類，源頭減廢，點知有口話人冇口話自己。其實，本港有兩個堆肥設施可以處理園林廢物，包括九龍灣廢物回收中心及牛潭尾動物廢料堆肥廠，結果得物無所用，回收量一直偏少，今年上半年只接收約七十六噸政府園林廢物，等於每日棄置量嘅一半咁大把，問你服未。
冇計喇，港府搞環保不嬲葉公好龍，淨係廚餘回收咋，講咗咁多年，依然十畫未有一撇。家陣連內地都有樹枝粉碎場處理園林廢物，香港乜都落後，簡直醜死怪！