中環出更：夏千福爆美領館人事機密
被喻為「小八國聯軍」之首嘅美國駐港總幹事夏千福，早前被中方警告唔好干涉香港內政，其後出席活動都乖乖三緘其口，保持低調。經過一輪沉寂，夏千福最近接受傳媒訪問時，唔知有心定無意，竟然自爆美國領事館機密，就係美國駐港領事館內嘅僱員只有一百四十人，無外間傳嘅一千人咁多喎。
稱港要走實際溫和路線
夏千福喺訪問中，否認建制中人指美國駐港領事館嘅僱員超過一千人，佢形容呢個傳言係荒謬同愚蠢，叫大家唔好認真看待。佢又話，港府好清楚領事館有幾多人，因為證件係由港府發出，現時喺領事館內工作嘅人不多於一百四十人。
另外，佢話香港有少數人喺政治光譜中各走極端，但佢唔認為呢啲少數聲音能夠代表香港，香港需要走嘅係實際同溫和路線。
夏千福過往以活躍於社交網絡見稱，不時喺網上發布自己嘅最新消息，以及落區嘅見聞。不過，佢喺訪問中強調，佢喺運用社交網站上並無任何策略，但事實係咪咁就真係見仁見智喇。佢又透露，自己好鍾意食川菜，仲話廚房先至係佢真正嘅戰場喎。
卓妮