政情:黑英喪咳 「市區空氣不能吸」

香港空氣污染嚴重,再加上近日熱浪襲港,留喺街上幾分鐘已經令人覺得非常難受。前天文台台長林超英(黑英)尋日喺個人網誌指,前日中午佢去咗佐敦及油麻地一帶,由於臭氧偏高,導致空氣已經變成「不能吸的空氣」,仲形容空氣中有刺鼻嘅氣味,導致佢吸一次就咳一次。佢曾經諗過忍住唔吸氣,不過唔抖氣會死,所以喺咳同死之間,佢選擇咗咳。

黑英大嘆,點解人擁有號稱解決所有問題嘅「高新科技」,但係竟然落得如此田地。佢仲叫精英分子到街上走走,同普羅大眾一齊享受經濟繁榮嘅「成果」,到時就會明白升斗市民唔再視「經濟發展」為最高原則,係因為發展令人類生存必備嘅空氣都冇!

慨嘆GDP價更高

黑英又進行「技術」分析,話當日吹西北風,因此推斷香港嘅空氣污染源自上游深圳。黑英慨嘆,港深追求經濟發展結果換來咁差嘅空氣,唔通GDP比空氣價值更高?

第一手消息請下載on.cc東網iPhone/iPad/Android/Windows Phone Apps