政情：黑仔馬恩國爭乜都輸
立法會明年換屆，各方疑似參選人開始蠢蠢欲動。其中屬於泛民票倉嘅法律界功能界別，建制派經已輸足廿年，輸到稍有自知之明嘅法律界人士都唔敢挑戰。最近政界有人提議，由外號「爆粗大狀」嘅大律師馬恩國做「爛頭蟀」出戰，就算唔能夠製造奇迹，起碼都可以增添多少火花。然而馬恩國過往嘅醜事，真係多到一籮一籮都載唔晒。更何況佢出名黑仔，爭乜都輸，建制派派佢出戰法律界不但係送死，直情係獻醜於人，自暴其短！
馬恩國係何許人也？資料顯示佢爸爸係著名愛國油畫家馬家寶，佢本人就早年喺香港讀書，後來去咗澳洲讀法律及攞到大律師牌，近年先至回流香港，其後成為香港執業大律師，後來仲做埋山西政協。佢首次涉足政界，係應徵做首批政治問責副局長，當時佢雖已加入最大建制派政黨民建聯，但最後仍然名落孫山。
爆粗被判停牌一個月
到一三年二月，馬恩國出席立法會一個公聽會時，被社民連「長毛」梁國雄翻炒佢應徵副局長失敗嘅醜事，佢立即老羞成怒，公然爆粗指長毛連「F××king Chinese」都不如。事件不但令佢臭名遠播，更引發大律師公會對佢進行紀律聆訊，最終判罰佢停牌一個月。
馬恩國嘅醜事仲未數完，同年三月，佢突然報名參選民建聯中委會，令人以為民記咁「重口味」，想捧佢做黨領導層。結果佢落選中委，政治生涯又衰一鑊，反映佢根本不獲該黨領導及黨員垂青。
自居「擦鞋仔」遭恥笑
之後馬恩國仲未知衰，繼續喺各個方面博出位、爭表現，希望喺政界更上一層樓，但最後都係出醜居多。包括擔任監警會委員時被人群起投訴，指佢嘅撐警立場偏袒，唔能夠公正處理各類警察投訴。今年初佢又向中央獻計，建議由內地訂立《反港獨法》暫代香港嘅《基本法》廿三條立法，事後仲以「岳飛」同「擦鞋仔」嚟自居，結果不但畀泛民法律界人士恥笑佢唔認識《基本法》同兩地法制，連建制派中人亦覺得佢「亂嚟」同「幫倒忙」，令佢哋處境尷尬，唔知盲撐佢好定係反對佢好。
有建制派人士分析，馬恩國咁博盡明顯係有所求，估計不論係立法會議員、全國政協委員、定係港區人大代表，佢都想爭住做，但做唔做得嚟又係另一回事，希望有關操盤人帶眼識人，否則隨時累到自己火燒身！