政情：民記「人板」陣被投訴阻街
區議會選舉臨近，有意參選嘅社區幹事都絞盡腦汁曝光。尋日有讀者報料，話民建聯（民記）中西區社區幹事楊學明喺西環水街行人路擺放咗自己嘅人形紙板，紙板記錄咗地區工作及寫上「梗有一刻喺左近」。本來個人宣傳冇乜嘢，但現場所見，佢就足足擺咗約二十個人形紙板，每個仲要五呎五吋高，好似真人排晒隊咁。有街坊就抵唔住頸報警，話佢呢啲人形紙板勁阻街，而警察到場後，楊學明只好將啲紙板收走。
楊學明話，呢啲紙板只係佔行人路六分之一範圍，係咪阻街真係見仁見智。佢話每個紙板要百多元，合共要三千元，今次一次過展示出來，係為咗顯示呢幾年該區爆水喉好離譜，希望街坊對此印象深刻，但佢承認既想宣傳爆水喉，亦想自我宣傳。其實佢喺四年前區選已經喺水街選區挑戰民主黨黃堅成，但以一百票左右落敗。據知黃堅成今年會退休，由新人伍凱欣接棒，似乎楊學明想趁機博到盡，務求搶得議席喎！