中環出更：楊偉雄許曉暉 配偶增持物業
行政會議成員、特首創新及科技顧問楊偉雄同民政事務局副局長許曉暉，前者被視為內定創新及科技局局長，卻因開局失敗而繼續無了期等待，後者則前後兩次都「升呢」失敗，二人至今都同問責局長一職擦身而過。近月二人再有共通點，分別增持寫字樓單位及住宅物業，同樣由配偶持有，莫非佢哋都睇好樓市前景？
據楊偉雄於行會最新利益申報，除咗繼續由配偶、其他親戚等持有多個住宅單位及店舖外，今年六月中新增由配偶持有新界葵涌一個寫字樓物業，自此楊偉雄於須予登記嘅個人利益中，無論住宅、店舖及寫字樓統統都有，只係爭在未見申報持有車位啫。
至於原本持有東區住宅出租物業嘅許曉暉，其利益申報於四月中亦有更新，由其配偶持有南區住宅物業作自住用途，依家許曉暉同丈夫於港島四個區議會嘅其中兩個區已擁有住宅物業，唔知第時再增持物業時，會否繼續優先於港島區落腳呢？
卓妮