政情：今日你上鏡：Ann姊妹花「童」遊夏令營

唔少立法會議員都趁暑假休會期間去旅行，叉足電等復會再博殺，而議員蔣麗芸（Ann）就同妹妹蔣麗萍去咗湖北，參加專為農村「留守兒童」而設嘅夏令營。阿Ann喺社交網站上載咗幾張相，話一連走訪咗四個唔同年齡嘅夏令營，見到小朋友咁專心學習，覺得好感動喎。睇番阿Ann嘅相，除咗小朋友開心，佢同妹妹都笑到四萬咁口，完全唔見佢平時喺議會起晒螫對住泛民主派議員嘅惡樣，相信佢哋都好享受同小朋友相處嘅時間。