政情：肥佬黎財困 公文袋乾塘
經營不善嘅壹傳媒集團早已經傳出陷入財政困難，作為泛民主派最大金主嘅該集團前主席黎智英（肥佬黎）都自身難保，有人就估計佢呢段時間應該會減少捐款支持泛民政黨。無獨有偶，之前有份收取肥佬黎超過六百萬元捐款嘅公民黨（公文袋）最近就大呻無錢，唔通肥佬黎真喺閂水喉？有公文袋成員透露，今年確實少咗六位數字嘅捐款，更加暗示捐款同肥佬黎有關，仲話依家個個黨友奉命撲水，以免經過今明兩年多場選舉後因財困而亡黨。
迎三選戰 山窮水盡
之前七一遊行，公文袋喺所有泛民政黨籌款數字插水下仍然逆市上升，籌到四十三萬元，理應唔愁無錢。不過，佢哋條數其實喺計埋賣毛巾同衫，所以扣埋成本都唔算賺好多，而該黨被批評支持港獨，唔少商界支持者都閂埋水喉，唔再支持該黨，咁數數吓該黨資金來源又真喺剩返好少。最弊都係該黨一直依賴嘅肥佬黎條大水喉，如今都變得「水滴滴」，一講到錢，睇怕民主都無情講喇。
據了解，該黨依家每次開會都有人督促黨友落力撲水，否則可能過埋三場選舉，包括年底區議會、明年立法會選舉及新東補選之後就山窮水盡。除咗叫黨員籌錢，公文袋下周日（8月2日）更加搞咗個獅子山遠足籌款活動，目標係籌六十萬元喎，咁喉擒，睇得出佢哋幾心急籌錢。
立場轉激 缺乏新血
除咗缺錢，其實公文袋都鬧緊人才荒，原來佔領行動之後，加入公文袋嘅人數每個月只徘徊喺個位數字，淪落到有人覺得「有（人加入）就已經好好」。而公文袋失去以前大狀黨嘅專業光環後，加入該黨嘅人已由過去嘅專業人士，變為依家大部分都係學生。專業人士寧願加入佔領之後冒起嘅專業團體，好似法政匯思、杏林覺醒咁，都唔加入變得激進嘅公文袋，人財兩失之下，其實該黨都應該諗吓，愈走愈激是否正確，如果唔喺「黨之將亡，指日可待」呀！