立法會上月否決政改方案，一班建制派議員「甩轆」臨場冇投票，及後互相批評，亦有人指泛民主派係「普選殺手」。唔知市民係咪眼見立法會內爭拗不斷，尋日中大香港亞太研究所公布嘅民調顯示，有六成市民對政黨印象欠佳，認為政黨經常爭拗，根本做唔到實事。亦有調查顯示，整體議員評分較兩個月前下跌，當中以工黨何秀蘭、公民黨陳家洛、立法會主席曾鈺成、工聯會陳婉嫻及民建聯葛珮帆評分跌得最多。
香港研究協會亦喺今個月廿一至廿八日，以電話訪問一千三百一十八人，對直選及超級區議會議員評分。泛民方面，何秀蘭及陳家洛評分跌幅大過建制派，兩人評分分別跌咗零點五五分及零點五三分，唔知係咪支持政改嘅市民將否決責任歸咎於佢哋呢？建制派方面，雖然曾鈺成有三點六分，為最高分議員，但都跌咗零點三六分，未知係咪同佢加入建制派WhatsApp群組「添煩添亂」有關。
至於超級議員陳婉嫻同樣下跌零點三六分，協會話相信同佢處理懷仔事件負面影響有關，不過嫻姐評分點跌都好，評分仍高過包尾嘅民主黨何俊仁。此外，民建聯葛珮帆亦下跌零點三二分，未知下跌原因。
卓妮