推動本地創意、協助年輕設計師創業嘅元創方（PMQ），開業首年勁蝕千六萬。不過，立法會紡織及製衣界議員鍾國斌（Felix）就透露，PMQ太抵租，唔少設計師都排唔到隊入場，佢依家幫手籌備緊一個九龍版嘅PMQ，位置喺深水埗區，預計最快年底就會開業。未知會唔會諗定啲新計仔，避免蝕錢呢？
財政預算案提出以五億元推廣香港時裝設計同品牌，身兼落實時裝業發展措施諮詢小組成員嘅Felix話，財政司司長曾俊華曾經同佢講：「唔夠錢就問我攞」喎！
Felix話，該筆資金首先會資助一個樣辦房，畀年輕設計師平價整衫辦，又會借出製衣業訓練局嘅地方同器材。
佢又話，明年九月會喺多個大型商場宣傳本地設計，已經搵咗一間國際汽車品牌贊助，亦會贊助年輕設計師到國外參加比賽咁話。