政情：范太疑裸退 楊紹信爭大董
今年三月召開全國人大及政協會議期間，失驚無神表態做完呢一屆唔會再連任嘅全國人大常委范徐麗泰，由於九月將屆七十歲，按慣例會卸下香港賽馬會大董一職，據聞接任大熱人選係羅兵咸永道會計師事務所大中華區前主席楊紹信。范太接連卸下多個公職，唔通佢部署「裸退」？
馬會大董將遴選
馬會大董此項公職素來都深受政商界歡迎，不過一直都係男人嘅世界。直至○八年范太出任大董先至改寫呢個百年歷史。時間過得好快，范太做咗八年大董就要講拜拜。
據聞新嘅繼任人必須由二百名遴選委員喺每年九月會員大會投票選出，剛於六月尾退休嘅楊紹信會競逐范太退休後騰出嘅空缺。楊紹信熱愛賽馬，其名下愛駒曾出征美國並獲得佳績。佢亦係全國政協及香港友好協進會成員。