近年立法會財務委員會（財委會）不時加開會議，主席唔單止要坐定定，仲要應付泛民主派議員「拉布」，真係少啲精力都唔得。剛卸任主席嘅張宇人（Tommy）之前預告好大機會唔連任，據聞建制派亦放棄由金融界議員吳亮星輪任下年度主席，所以本身係副主席嘅保險界議員陳健波最大機會「升呢」做主席。不過，陳健波話，如果唔修改議事規則三十七（a），任何人做主席都係艱難嘅，似乎係未上場就戴定頭盔喎。
Tommy同陳健波尋日開記者會，回顧財委會喺一四至一五年立法年度工作。陳健波大讚Tommy開咗百幾個鐘頭會議都冇頭暈身興，證明佢好有能力。佢又透露，建制派有人叫佢做財委會主席，但依家時間尚早，十月時建制派會再開會商討，重申自己唔會主動爭主席嚟做。
另一方面，Tommy之前揚言好大機會唔連任財委會主席，惹來外界猜測佢係想以退為進。佢尋日講明下屆唔會做主席，希望大家唔好再猜疑佢，期望下屆主席可以做得好過佢好多。雖然係咁，佢亦不忘晒吓自己喺過去一年政績，包括開咗八十五次會，時數長達大約一百八十小時，無論係次數同時間都成為咗歷年之冠。