政情：傳栢志高接任西九CEO
西九文化區工程一波多折，首先出現超支及延誤問題，現有資金僅足夠興建第一期及第二期工程，第三期工程則落實無期；加上現任西九行政總裁連納智已辭職，預料喺下月初離任。據了解，西九文化區董事局今日開會，有傳會討論由去年十月上任西九營運總裁嘅栢志高，接替連納智出任行政總裁，似乎想栢志高呢個前政務官執西九呢個爛攤子。
有西九董事局成員證實，一早提出今日會議要討論由誰人接任行政總裁一職。另有西九董事局成員稱，暫時睇唔到討論行政總裁繼任人嘅議程，唔排除有人臨時提出討論此事。
有董事局成員未開會就反對
不過，有董事局成員未開會就表明反對由栢志高直接頂上做行政總裁，事關依家全球招聘都未完成，佢估計最多只會傾由栢志高署任行政總裁一職，因為每次開會都有行政總裁報告，估計有可能會交代最新招聘情況喎。