香港呢個「福地」，睇怕氣數已盡，鉛水恐慌愈演愈烈，不但公共屋邨住客人人自危，竟然連豪宅都中招！老朽近日老人斑多咗，睇怕現居嘅野村啲食水都係唔多穩陣，唔知有邊個議員想來野村抽抽食水驗吓呢？老朽必以野村之大蕉及野菜招呼之！
佔領運動後，政改遭否決，政府話要集中精力處理經濟民生議題，可惜，天不從人願，一「鉛」激起千重浪，鉛水恐慌加退伍軍人桿菌，已令政府疲於奔命，講真，幾個局嘅局長出來見傳媒解畫，卻愈解愈多疑慮，即使ＣＹ宣布成立由法官任主席嘅獨立調查委員會，畢竟遠水不能救近火，處理不當，難免會變管治危機！
一葉落而知秋，香港之沉淪，亦可謂有迹可尋！睇吓曾經以服務一流、乘客至上嘅國泰，竟然淪落至似廉航，甚至衰過廉航！
是咁的，國泰繼勞資爭拗、食水污染、航機險撞；最新事故係客機運錢失巨款……混亂事件停不了！讀者譚先生投訴客機延誤，職員又冇解釋原因，又要乘客徒步走到相隔至少十五分鐘路程嘅接駁巴士，直情走難咁款！譚先生又炮轟國泰「連水都無支」，今時今日咁嘅服務態度，國泰可以休矣！
當然，國泰大可以學港產官僚，把歪理當真理，好似啟晴邨食水含鉛事件引爆全城恐慌，衞生防衞中心監測及流行病學處主任程卓端代表當局出來解畫，就話從科學角度籲市民毋須太擔心，如果一生拉勻來講，只要唔超過十微克，對健康並無明顯影響。
所以話，如果閣下一生拉勻來講，只要被國泰糟質唔超過十次，對其日漸低落嘅服務質素不必太介懷，一個失敗的機構依然令你見到希望，老朽暫時只走難過九次，拉勻來講，對國泰服務也也烏冇明顯意見！講完。