早前有補習社賣廣告，標榜「子女未來住太和還是銀湖天峰，視乎暑假您的安排」作生意招徠。原來買唔買到樓，唔止同揀咩補習社有關，仲要睇政府可唔可以順利成立創新及科技局（創科局）。話說尋日保險界立法會議員陳健波喺財務委員會審議創科局撥款申請時，就話成立創科局可以為青年人提供就業機會，仲話「年青人要向上流、年青人要組織家庭、年青人要買到樓，創新科技其實係唯一嘅希望！」講到創科局咁神奇，難怪有議員寸爆話，當創科局係神燈咩！
