政情：鑽石媒人加盟新民黨

田二少促成 葉太讚啱傾

Mei Ling之前因為幫電視「盛女」真人騷擔任幕後顧問而廣為人知，據聞佢手上有唔少優質筍盤，莫非加入新民黨係幫手牽紅線？我哋問過新民黨主席葉劉淑儀，佢話主要係大家理念相近，而該黨本身桃花都好旺盛，應該唔使Mei Ling出手喎。

葉劉話，早前Mei Ling同該黨副主席田北辰（田二少）喺社交場合碰面，雙方都幾傾得埋，田二少就邀請對方入黨，對方亦感興趣，於是促成咗呢件事。葉太又大讚Mei Ling係現代紅娘，由青年人成家、求偶，到七、八十歲長者嘅姻緣都能夠撮合，但最重要係大家理念同教育背景相近，所以先咁啱傾。

講開姻緣，葉劉話新民黨桃花都好旺，早前先有幾對新人拉埋天窗，所以佢一啲都唔擔心。佢又話每月都有人自動申請入黨，唔少仲係顧問、醫生、商人，成績好理想。