政情：公文袋黨魁後繼無人

如果袋巾傑真係唔參選明年立法會選舉，公文袋就首先要搵定人接替袋巾傑嘅九龍東議席，然後考慮埋由邊個接棒做黨魁。假設公文袋主席余若薇唔參選明年立法會選舉，按道理袋巾傑唔做黨魁嘅話，就好大機會由曾任公文袋主席嘅現任議員陳家洛擔任黨魁。不過，陳家洛同該黨議員毛孟靜（阿毛）不咬弦已經係公開嘅秘密，聞說阿毛已經揚言，如果陳家洛做黨魁，佢就會退黨喎。

阿毛接手 或掀退黨潮

雖然阿毛一向獨來獨往，仲同非黨友新民主同盟議員范國威搞咗個「香港本土」，但阿毛亦因此得到一啲本土派嘅支持。袋巾傑早前先至提倡公文袋都要將本土主流化，甚至要將本土論述加入黨綱，如果任由阿毛退黨，可能會令該黨流失部分本土派支持者。不過，如果由阿毛擔任黨魁，以阿毛嘅人緣恐怕引發更多人退黨都未定。至於該黨現屆其他議員即使下屆順利連任，擔任黨魁一職亦恐未成氣候。

袋巾冧莊 苦了譚文豪

倘若公文袋左揀右揀都係得個爛燈盞，袋巾傑就分分鐘因為冇人接班而要做多一屆。如果係咁就難為當初由東涌轉戰九龍東嘅飛機師黨員譚文豪（Jeremy）喇。事關今屆立法會選舉，Jeremy原本可以出選新界西議席，但最後該黨就安排咗現任議員郭家麒上陣，Jeremy惟有轉戰九龍東、跟隨袋巾傑，加上去年東涌區議會補選原本由Jeremy出戰，但又讓路畀黨友余俊翔，如果明年再要Jeremy讓路，分分鐘輪到佢話退黨都似。