中環出更：立會「兩舊雲」落區鬥防曬
立法會財務委員會加開會議都未能在暑假前通過成立創新及科技局撥款，一班議員各有各精彩，有議員就疊埋心水放假外遊，有議員就留港繼續抽鉛水。不過，喺鉛水風波上鬥得難分難解嘅立法會「兩舊雲」民建聯蔣麗芸（Ann ）同民主黨黃碧雲（一舊雲），連夏日防曬方法都鬥一番，大談防曬招數。
阿Ann話，夏天出席地區活動鬼咁曬，都要有啲準備，會搽SPF30左右嘅防曬液，怕用得太高防曬度數對皮膚唔好，又話曬多啲都有好處，可以預防骨質疏鬆喎。炎炎夏日，問佢會唔會帶把強勁風扇仔，佢就話唔會喇，覺得啲電用得太快，唔係咁環保，又話無理由落區成日攞把紙扇撥撥撥嘛，好彩佢都唔怕熱。
何俊賢叫妻煲菊花茶
至於一舊雲就話自己落區都曬慣，都會帶把風扇、搽吓防曬，好彩本身黑底唔怕再曬黑，而平日落區都會避開啲太曬嘅時段，例如會揀朝早落區。不過，佢話有時都避唔到，試過有次下晝三點去籌款，企喺個冇遮冇擋嘅十字路口，搞到由頭濕到落腳，惟有換過件衫啦。
女士要做足防曬準備，男士就唔使擔心啦，好似漁農界議員何俊賢話，細細個就開始打波，曬到慣晒，唔使搽嘢嘅！
佢話，見到有人帶風扇，就會搶嚟用吓囉。不過，佢就趁機詐型，話太太唔識煲冬瓜水畀佢消暑，近日就叫太太學吓煲菊花茶喎！
梁繼昌陪囡囡遊南歐
講到去外遊嘅議員，會計界嘅梁繼昌就陪緊囡囡，喺南歐四國旅行，包括塞爾維亞、克羅地亞、馬其頓及土耳其，去兩個星期後先返香港。
點解去咁耐？原來係因為佢十六歲囡囡今年九月會去英國讀書，所以希望趁出行前去一次長旅行，難怪佢連財務委員會都唔開喇。
卓妮